Croniques catalanes

1. Eth « cas Millet » a prenut un nau camin: eth deth dangerós ahèr deth finançament ilegau des partits o des sues fondacions. Dangerós entara credibilitat deth sistèma, se vò díder. Auem descubèrt que mès de 600.000 èuros an anat a parar ara fondacion Trias Fargas, de Convergéncia, gessudi dirèctament dera Fondacion Orfeó Català – Palau dera Musica. Eth dirigent convergent Àngel Colom, proòm en sòn moment deth Partit pera Independéncia amassa damb era periodista Pilar Rahola e personatges alavetz non tan coneishudi coma eth president deth Barça, Joan Laporta, a reconeishut tanben que recebec sòs dera factoria Millet quan eth sòn partit ne existie e acabaue d’ingressar coma militant convergent. Artur Mas aurie de dar explicacions publiques e exigir responsabilitats. Sòs dera cultura usadi entà hèr partit, encara que tostemp mos an dit  -e diden- que « hèn país ». Guaires irregularitats s’auràn hèt en nòm deth « país »? Patriotisme de paraula, coma mos didie eth president Montilla aguesta dimenjada. Ei a díder, de bla, bla, bla.

2. Eth deputat popular Daniel Sirera ei er unic dirigent dera oposicion politica catalana qu’a visitat eth sindic Francés Boya quan a vengut tara Val d’Aran. Protocòl mane. Non ac an hèt pas toti. E aguest hèt l’aunore. En uns moments dificils, en qué eth sòn partit a decidit prescindir deth sòn lideratge, li publiquen ara un messatge de mobil comprometut (« este partido es una mierda »). Tanben n’a estat victima eth conselhèr Saura, d’aguest procediment plan discutible. Non sabem ce quin ei eth dret que prevau: s’eth dera informacion o eth derivat pera correspondéncia privada; mès ei dilhèu un tant injust.

3. Qui ei Joan Carretero? Donques ei un mètge de Puigcerdà, coma eth s’a autodefinit, en tot dar-se faussa modèstia. Donques ei vertat. Ath delà d’èster exconselhèr deth prumèr Tripartit, deth que renègue tant, e alcalde pendent ans e ans deth caplòc dera Cerdanya, ara ei sonque aquerò que ditz qu’ei e president d’ua associacion que sonque se represente, enquia ara tanben, ad a era madeisha. Ua associacion independentista, inspirada en un nacionalisme conservador, que combrègue damb ua part importanta dera opinion publicada de clar signe nacionalista conservador. D’aquiu, eth ressò mediatic desproporcionat, non corresponut damb era realitat politica e institucionau de Catalonha. Dempús des eleccions, ne parlaram, atau coma hèrem damb Ciutadans, un aute fenomèn de temporada.

Advertisements

Daissar una responsa

Fill in your details below or click an icon to log in:

WordPress.com Logo

You are commenting using your WordPress.com account. Log Out / Cambiar )

Twitter picture

You are commenting using your Twitter account. Log Out / Cambiar )

Facebook photo

You are commenting using your Facebook account. Log Out / Cambiar )

Google+ photo

You are commenting using your Google+ account. Log Out / Cambiar )

Connecting to %s