Era pregunta, melhor dit, es dues preguntes entà ua “consulta”, pactades per CiU, ERC, ICV-EUiA e CUP, an agut era unica responsa deth “non” previsible de Rajoy, coma nau punt culminant d’aguesta escalada de confrontacion, que semble autocomplir era profecia anonciada de forma crudenta peth simpòsi dera polemica, de títol maniquèu e reduccionista (“Espanha contra Catalonha”). Entre era “unilateralitat” pressada d’uns e era paret “constitucionau” que lhèuen es auti, er estatut territoriau catalan, que cau cambiar e reformar pregonament, torne a èster motiu de relevància publica, mentre cau tier en compde qu’era urgéncia sociau, laborau e economica non dèishe de tustar ena pòrta. Sense cap acòrd prèvi damb es institucions legitimes der Estat, arribe un nau acòrd intèrn entre representants autant de legitims e desirat per ua part significativa dera societat civil, que, tot ac cau díder, compde damb un supòrt menor der artenhut peth malaguanhat Estatut de 2006, er hantauma deth quau encara subrevòle era nòsta politica. Ua causa ei clara dempús de mesi de debat exclusiu ar entorn deth qué e eth quan: auem ath dauant un nau an de “procès” (ua eternitat en politica) damb data limit, a 9 de noveme, que pòt acabar coma dia probable de naues eleccions, se non i auesse un improbable cambi d’opinion en govèrn centrau. Alavetz, tà a on vam? E qué passe damb Aran? Era Val, territòri singular, torne a quèir en desbrembe deth procès, ja que, metudi en ahèr, poderie devier subjècte d’ua tresau question sus eth sòn estatut respècte d’aquera naua situacion. Es “preguntes” mos genèren mès preguntes, frut dera complexitat deth moment.
(DIARI SEGRE, 14 de deseme de 2013)
amadormarques.com 