Madrid

Madrid ei ua vila damb nèrvi, de dia e de net. Es carrèrs centrics, victimes dera lordèra apilerada aguesti dies, dèishen passar, damb dificultats, era gent de diuèrsa procedéncia que va e ven deth caplòc espanhòl, damb aqueth punt caotic provocat pes veïculs estressadi ara caça der asfalt e deth temps que passe. Quina grana ciutat entà un ajuntament (e un modèl politic) endeutat e metut en question peth sòn triomfalisme uet! En hons, eth problèma d’Espanha e Catalonha qu’ei eth madeish: eth collaps d’un sistèma politic e economic que genère hartament, dilhèu ja resignacion, en tot cas besonh de cambi pregon peth camin dera justícia e era dignitat. Eth visitaire pròve Madrid damb eth gust d’un esdejuar damb chicolate e pòrres e un dinar de tauèrna a un prètz rasonable, en un ambient lèu lèu familiar, mès improbable ena Barcelona cool, mediterranèa, toristica, damb d’auti atractius, en fin dispariona. Damb aquera energia doça començàuem era dimenjada, abantes de participar ena conferéncia politica deth PSOE. I anaua damb mauhidança, mès i é vist un dinamisme esperançat, aqueth nèrvi civic, enes qu’i an prenut part en profit d’ua alternativa renauida, d’esquèrra, possibla, a compdar d’ua experiéncia d’encèrts e conquistes sociaus e, autant, de tòrts incomprensibles enes sòns ans de govèrn. En acabar, tornam tath centre, hèm un mòs ena plaça de Lavapiés, a on s’amassen nauvengudi e ròstres desemparadi pes injustícies, e auançada era net excentrica, descurbim, apròp de Sol, ua libraria dubèrta damb tresaurs ben sauvadi dera literatura espanhòla e eth pensament universau. Mo’n vam tath lhet estornejadi, mès acompanhadi de Gracián, Dilthey e un corròp de presocratics, que, per miei dera sua agudesa critica, mos ensenhen era complexitat d’aguest món incèrt.

(DIARI SEGRE, 16 de noveme de 2013)

Advertisements

Daissar una responsa

Fill in your details below or click an icon to log in:

WordPress.com Logo

You are commenting using your WordPress.com account. Log Out / Cambiar )

Twitter picture

You are commenting using your Twitter account. Log Out / Cambiar )

Facebook photo

You are commenting using your Facebook account. Log Out / Cambiar )

Google+ photo

You are commenting using your Google+ account. Log Out / Cambiar )

Connecting to %s