Blanca tardor

Es bromes arribèren viste tà arrapar-se as tucs e bòsqui des montanhes abituades ad aguest saile, e era val demorèc en un estat de doça letargia, entutada ena esperança deth temps propici que torne a començar. Eres, que son de casa, s’escampilhen pes cornèrs e ribères deth sòn entramat, mentre es auets que tòquen eth cèu vestissen eth bromilhon grisós que, en ensem, vedem compacte e topit coma eth tet que curbís era anma estalimòrta. Non passe, de hèt, guaire mès temps e ja buhe un heired persistent que lèu dèishe quèir es lèrmes esponjoses d’ua nhèu auançada a sa sason. Tardiues sigueren era passada primauèra; d’ora tornen a ocupar, tanben pressades, eth lòc qu’abandonèren damb eth bronit dera aigua sauvatja enjós. Non èm pro conscients qu’eres mos an impedit degustar un glop de bona tardoada, acaçada dejà per calors estonantes ara debuta. Fenomèns succedidi sense fin ena finitud d’un paisatge virat tora nordica abitud. Es flòcs s’acantièren e l’emblanquilhen. Sonque despunte eth verticalisme desafiant d’uns campanaus qu’an per losat un capuchon nere e esguitlent, liure e resistent ara blanca invasion. Era demora deth principi se transforme en activa rotina toristica, mentre era geladiua assolide era hita que dam per guanhada. E alavetz, quan eth cromatisme uniforme semblaue definitiu, trauessam eth tunèl deth paisatge e descurbim que d’auti parçans, coma aguesti tanplan misteriosi deth Prepirenèu e eth Pirenèu sud, se revèlen encara vius (o vius d’ua auta forma), marronosi e ludents de solei transparent, en tot persutar en sentiment dera nostàlgia de çò que, enguan, de moment, non a estat ena val, perque s’i amague ath dejós e gelós dera guardada impertinenta dera istòria estornejada peth temps, tostemp eth temps. 

(DIARI SEGRE, 30 de noveme de 2013)

Advertisements

Daissar una responsa

Fill in your details below or click an icon to log in:

WordPress.com Logo

You are commenting using your WordPress.com account. Log Out / Cambiar )

Twitter picture

You are commenting using your Twitter account. Log Out / Cambiar )

Facebook photo

You are commenting using your Facebook account. Log Out / Cambiar )

Google+ photo

You are commenting using your Google+ account. Log Out / Cambiar )

Connecting to %s